Main Sunya Hoon
Main samaaj ke un niyamon aur vidhi-vidhaanon ko
nahi maan sakta jo sochne par hi tarrk-hin lage.
Jahan buddhi chup kara di jaati hai
aur darr ko hi dharm bana diya jaata ho.
Main un reeton ko nahi maanta
jo insaan se pehle uski soch ko maar deta ho.
Jeevan har kisi ko sirf ek baar milta hai,
aur mrityu bhi sirf ek baar aati hai.
Jo chala gaya, wo fir kabhi laut kar nahi aata.
Na wo dekhta hai, na wo sunta hai,
na wo ro sakta hai.
Fir ye kaise maana ja sakta hai
ki uski aatma kahin baithi hui hai
ye sab wo dekh kar ro raha hoga?
Mujhe ye baatein bas kalpana lagti hain,
satya to bilkul bhi nahi.
Jab koi insaan jeevit hota hai
tab uski aatma par har din chot padti hogi.
Kabhi apno se, kabhi samaaj se,
kabhi un niyamon se
jo usse jeene se pehle hi jhukne par kitni bar
majboor kar dete hoga, Na jaane kitni baar
uski aatma ko thes pahunchta hoga,
na jaane kitni baar wo bina bole hi bhitar se ro deta hoga.
Tab kisi ko uski aatma ki chinta nahi hoti thi.
Par jaise hi wo duniya chhor kar chala jaata hai,
sab log achanak uski aatma ke liye
shanti maangne lagte hain.
Na jaane kitne sadiyon se kitne vidhi-vidhaan
aur karmkaand chalte aa rahe hain
sirf is baat ke liye ki marne ke baad
uski aatma ko shanti mil jaaye.
Par unse poochta hoon, jo apne
sharir se chhoot chuka hai jo dard
bhay aur pehchaan se mukt ho chuka hai,
uske shanti ki zarurat hi kyon hai?
Asli shanti toh use tab chahiye thi
jab wo jeevit tha
aur har roz wo thoda thoda mar raha tha.
Agar aatma hoti bhi hai toh sabse
zyada wo jeevan ke dauraan rota hoga,
na ki mrityu ke baad. Mrityu toh
bandhanon se mukti hai.
Fir hum usse itna bhaari bana kar
itna darr kyon jod dete hain?
Mere man me ek aur prashn uthta hai ki-
Is dharti par sirf insaan hi nahi rehte.
Kitne pashu, kitne panchi, kitne jeev praani
rehte hain, jo bina kisi shabd ke jeete hain.
aur bina kisi shor kiye hi mar jaate hain.
Unki aatma ka khyaal kabhi kisi ko kyun nahi aaya?
Kya paramatma sirf insaan ka hi bhasa samajhte hai?
Kya baki praaniyon ke liye daya sirf unke liye kuch nhi?
Agar dharm bana bhi toh inshaan ne
kitne bhaagon me baant liye.
Kisi ne Mandir keh kar,
Kisi ne masjid, Keh kar
Koi girja-ghar keh kar,
toh koi gurudwara keh kar
Ek hi sach ko alag alag deewaron me
baant kar rakh diya insaano ne
aur khud ko hi khud se tod liya.
Dar ke saath bhakti,
aur bhakti ke saath nafrat.
Yahi toh sabse gehra dhokha hai
jo samaaj ne apne hi saath kiya hai.
Mere shabd kai logon ko chubh sakte hain.
Kyunki jab aastha par prashn hota hai,
toh darr hilne lagta hai.
Par main kisi ko giraane ke liye nahi likhta.
Main bas apni soch ko
tark aur anubhav ke saath prakat karta hoon.
Mujhe ye samaaj apnaaye ya thukraaye,
isse mujhe koi farq nahi padta.
Main apni aatma ke saath jhooth nahi bol sakta.
Jo mujhe sahi laga, wo maine keh dala.
Baaki log apni parampara maane,
mujhe koi aitraaz nahi.
Par main bheed ka hissa nahi hoon.
Main apni hi raah par chalta hoon.
Main Sunya Hoon.
Aur Sunya hi Sabse Badi Azaadi Hai.
RAHUL | MYSTIC | WAY