Safed Libaas Mein Lipta Har Chehra Paak Nahi Hota
Safed libaas dekh kar aksar log apni nazar jhuka lete hain, Jaise kapdon ka rang hi sach ka pramaan ho,
Jaise safedi dekhte hi sawaal karna gunaah ban jaata ho. Kuch chehron par jo chamak hoti hai par woh insaaniyat ki nahi hoti –
woh pad, kursi aur pehchaan ki hoti hai, aur yahi chamak dheere-dheere logon ki aankhon ko andha kar deti hai.
Safed kapdon mein lipta har chehra paak nahi hota, Kai baar sabse zyada kharaab niyat ki soch wahi se janam leti hai, jahan baatein sabse shuddh boli jaati hain.
Yeh vichaar kisi ek vyakti ki nahi hai. Yeh vichaar hai us soch ki jo insaan ko kursi tak pahunchte hi puri niyat hi badal jati hai.
Jab tak koi insaan neeche hota hai, toh woh sachh, nyay aur imaandari ki baat karta hai. par jaise hi pad paa kar kursi milti hai, uske lafzon ka wajan hi badal jaata hai.
Tab sach bojh ban jaata hai aur khamoshi samajhdari, Yahan manch se naitikta ka gyaan diya jaata hai,
par parde ke peeche fileon ke bhaao lagne lag jaate hain.
Wahi se fir tay hota hai – kisse upar uthaya jaayega, aur kisse neeche hi daba diya jaayega.
fir chahe Koi neta ban kar aata ho, koi afsar ban kar,
koi corporate ke sheeshe wale kamre me baith kar
hazaaron zindagiyon ke faisle likhta hai.
Sabke libaas alag hote hain, par soch ek jaise hoti hai. wahi soch
Power satta ki, Power pad ki, Power Kursi ki.
wahi nasha, wahi bhookh, wahi andhaapan.
system mein ek niyam chupchaap sikhaya jaata hai – jo jhuk jaaye, wahi samajhdaar.
jo sawaal kare, wahi pareshaani. sach bolne wala yahan kabhi hero nahi hota.
woh hamesha system chalane wale log ke liye khatara hota hai.
Daftar ke corridor me muskaanein ghoomti rehti hain,
chai ke cup mein mithaas hoti hai, baaton mein sab kuch “theek ho jaayega” hota hai.
par unhi deewaron ke beech laakhon ke sapne dheere-dheere ghut karmar jaate hain.
Kisi ki file saalon tak nahi khulti hai, kisi haq ka ek signature ke bina adhoora kaam reh jaata hai.
Aur koi ek phone call par sab kuch paa leta hai. bas yahi farq hai.
Jab kursi par baitha insaan apne pad ko apni pehchaan samajh leta hai,
tab woh bhool jaata hai ki kursi se pehle bhi woh sirf ek insaan tha.
tab faisle kanoon se nahi likhe jaate, apni ahankaar se likhe jaate hain.
Aur wahi se bhrashtachar ki suruwat hota hai.
bhrashtachar sirf paisa nahi hota, woh soch hota hai
jo galat ko “majboori” aur sahi ko “bewakoofi” bana deta hai.
Dheere-dheere system insaan ko yeh sikha deta hai ki –
- “Zinda rehna hai to sach mat bolna.”
- “Bachna hai to bheed ka hissa ban jao.”
- “Apni awaaz se pehle apni kursi bacha lo.”
isliye yahan sab safed libaas ko pehente hain, par andar ka rang roz aur kaala hota jaata hai.
Corporate mein target ke naam par zameer becha jaata hai.
Sarkari daftar mein niyam kaanun ke naam par insaaf mara jaata hai.
aur Siyaasat mein janseva ke naam par janta ko bewakoof banayi jaati hai.
Har roz nayi yojna ka elaan hota hai, par
zameen par wahi bhookh, wahi laachari, wahi majboori khadi rehti hai,
aur jo in sab ke beech sach likhne ya bolne ki himmat kare – toh usse ya toh chup kara diya jaata hai,
ya dheere-dheere system ke shor me gayab hi kar diya jaata hai.
Safed jhooth ka nakaab itna khoobsurat hota hai, ki log kaale sach ko koi bhi dekhna hi pasand nahi karte.
Sab kuch saamne hota hai, par dikhta sirf wahi hai, jo dikhaya jaata hai.
Is desh me andhera aksar raat mein nahi hota. woh din ke ujale mein hota hai –
bilkul safed libaas ke beech. Yeh likhawat kisi vyakti ke khilaaf nahi hai,
na kisi raajneeti sangathan ke khilaaf hai, kisi naam, kisi chehre par hamla nahi hai.
yeh us soch ke khilaaf hai. jo kursi milte hi insaan apni insaaniyat ko utaar kar rakh deti hai.
yadi yeh mere lafz aapko chubhe hain, toh gussa mat hona.
kyunki yeh unke liye nahi likhe gaye jo sach se lad rahe hain.
Yeh unke liye likhe gaye hain jo sach ko dekh kar bhi use chupchaap dabaye baithe hain.
Aur shayad isi liye —
safed libaas mein lipta har chehra paak nahi hota.
RAHUL | MYSTIC | WAY