Har kisi ka jivan ek kitab ki trah hota hai
Har kisi ka jivan ek kitab ki trah hota hai. Is kitab me har panna ek jaisa nahi hota.
Kuch panne muskurahat se bhare hote hain, kuch panne aansuon se bheeg jaate hain,
aur kuch panne aise hote hain jahan likhne ke liye kalam bhi kaanp jaata hai.
Par sach ye hai
ki jivan me sabse zyada farq is baat se nahi padta ki kitab me kya likha hai.
Asal farq is baat se padta hai, ki aap roz kaun-sa panna khol kar baith jaate ho.
Kyunki jis panne par insaan sabse zyada samay bitaata hai,
dheere dheere wahi panna ki tarah soch banne lag jata hai.
Aur soch, kab aadat ban jaaye iska pata kabhi nahi chal pata hai.
Fir wahi soch
bolne ke tareeke me aa jaati hai, sochne ke andaaz me aa jaati hai,
aur ek din poori zindagi ka rukh mod deti hai.
Kuch log apni kitab ke dard wale panne ko baar baar padhte rehte hain.
Wahi purani baatein, wahi tooti umeedein, wahi sawal — mere saath hi aesa kyun hota hai?
Unhe aesa lagta hai ki wo apni kahani samajh rahe hain,
par asal me wo us kitab ki kahani mein kaid ho chuke hote hain.
Dard jab yaad ban jaaye to chalna mushkil bahut ho jata hai,
par aage badhna bahut mushkil ho jaata hai.
Kuch log khushi ke panno me hi atak jaate hain.
Beetein hue pal achha koi waqt, purani hansi, wo pal jahan sab kuch theek tha.
Par jo sirf beete kal me jeeta hai, wo fir aaj ke sach se aankh nahi mila paata.
Kyuki jo beet chuka hai wo kitab ka hissa to ho sakta hai, par zindagi ka raasta nahi.
Fir kuch log hote hain jo sangharsh ke panno se darte nahi.
Wo jaante hain ye panne bahut bhaari hote hain, par yahi panne insaan ko gehra banate hain.
Sangharsh kabhi insaan ko todta nahi, wo bas uske andar ki neend tod deta hai.
Aur jab neend toot jata hai, tab insaan sirf jeeta nahi, jivan ko samajhne lag lagta hai.
Jivan ki kitab mein sabse khatarnaak cheez dard nahi hoti hai.
Sabse khatarnaak hota hai ek hi panne par ruk jaana.
Chahe wo panna dard ka ho ya fir kuch pal ka khushi ka ho.
Kyuki zindagi rukne ke liye nahi bani, zindagi to behne ke liye bani hai.
Jo behna chhod deta hai, wo zinda hote hue bhi andar se thaka hua hota hai.
Isliye zaruri nahi ki aap apni kitab ke bure panne ko achanak se faad do.
Zaruri sirf itna hai ki aap un par apna ghar mat samjho, bas samjho ki kuch der ka hi safar hai.
Har panna apni jagah sahi hota hai, par har panna zindagi nahi hota.
Zindagi to wo hoti hai jo har pichle panna ko padh kar agle panne ko padhne ka jigyasha bhar le.
Jab insaan ye samajh leta hai ki har din ek naya panna hai, tab uske andar ek shaanti utarti hai.
Fir dard aata hai to wo kabhi dukhi nahi hota, khushi aati hai to khushi ka ghamand nahi karta,
aur jb andhera aata hai tb ghabra kar kahi bhi bhagta nahi.
Wo bas itna kehta hai ki — ye bhi meri kitab ka hi ek panna hai.
Aur shayad isliye jivan hume sikhaaya nahi jaata, bas jeene ke liye de diya jaata hai.
Taaki hum khud tay karein ki apni kitab me kaunsi soch se agla panna ko likhna hai.
Kyun ki ye yaad rakhna jaruri hai ki —
“Zindagi ek kitab ki panne ki tarah hota hai,
par pehchaan ussi panne se banti hai,
jahan hum sabse zyada ruk jaate hain.
Chahe wo khushi ka ho, ya dard ka bojh ho,
ya phir wo sangharsh ka jahan sukoon
bas naam ka hi hota ho.”
RAHUL | MYSTIC | WAY