Meri Likhawat Meri Gawaahi
Isliye nahi kyunki main likhna jaanta hoon, balki isliye kyunki main jeena jaanta hoon – aur jeene ke dauran jo mehsoos hota hai, wahi likhawat ban jaata hai.
Main likhta hoon taaki beet chuki zindagi ki un galtiyon ko phir se na dohraoon, jinhe samajhne me waqt laga.
Har insaan galti karta hai, par har koi un galtiyon ko yaad rakhkar apne aaj ko behtar banane ki himmat nahi karta.
Likhna mere liye wahi himmat hai. Ek aisa sheesha jisme main roz apna sach dekh sakoon, bina kisi bahane ke.
Main likhta hoon apni haar ko samajhne ke liye. Kyunki har haar kamzori nahi hoti. Kai baar haar sirf itna sikha jaati hai ki sab kuchh tumhare bas me nahi hota.
Likhte waqt main apni haar ko dushman nahi banata, main use guru bana leta hoon. Jo mujhe sikhata hai ki har baar jeetna zaroori nahi, par har baar samajhna zaroori hai.
Main likhta hoon apni saanson ko zinda rakhne ke liye. Zindagi aksar itni tez ho jaati hai ki insaan saans lena bhool jaata hai.
Zimmedariyaan, rishton ka bojh, khamosh dard – sab kuchh ek saath chalne lagta hai. Likhna mere liye rukna hai. Ek gehri saans lena hai. Apne aap se milna hai, bina shor ke.
Main likhta hoon kyunki zindagi mujhe sirf ek baar mili hai. Is safar me kabhi koi apna saath chhod jaata hai,
kabhi koi apna hamesha ke liye door chala jaata hai, aur kabhi kisi ko chhodna hi padta hai – chaahkar nahi, majboori me.
Ye sab baatein jab mann me dab jaati hain, to bojh ban jaati hain. Likhna un bojhon ko shabd de deta hai, taaki mann halka ho sake.
Main likhta hoon kyunki main jaanta hoon meri saansein poori tarah meri nahi hain. Har saans kisi na kisi zimmedari se judi hai – maa-baap, patni, bachchi, parivaar.
Par meri likhawat, meri poori tarah meri hai. Us par kisi ka haq nahi, koi shart nahi. Wahan main jaisa hoon, waisa hi ho sakta hoon.
Likhna mere liye shikayat nahi hai. Likhna rona bhi nahi hai. Likhna ek shaant sweekar hai – apni kamiyon ka, apni galtiyon ka, aur apni sachchai ka.
Jo insaan likh leta hai, woh dheere-dheere kathor nahi, gehra ho jaata hai.
Isliye meri likhawat sirf shabd nahi hoti. Woh gawahi hoti hai is baat ki ki main bhaaga nahi. Main toota hoon, par jhoota nahi hua.
Main chup raha hoon, par andhar se mara nahi hoon. Main badla hoon, par apni aatma bech kar nahi.
Aaj jab main peeche mudkar dekhta hoon, to meri likhawat mujhe judge nahi karti. Woh bas itna kehti hai “Tu gira tha, par tu khada bhi hua tha.”
Aur shayad isi liye, main likhta hoon.
apni hi likhawat ke itihaas me gawah banne ke liye.
RAHUL | MYSTIC | WAY