Kya Mai Sach Me Zinda Hu?
Aaj dil ne, mann se ek sawaal pooch liya – kya mai sach me zinda hu?
Saans chal rahi hai, dil dhadak raha hai, log mujhe dekh kar kehte hain,
“sab theek to lag raha hai” Par fir bhi ye sawaal andar se uthta hai,
jaise kuchh adhura reh gaya ho.
Zinda hona sirf saans lene ka naam nahi hota
Zinda hona hota hai – apne faislon ke saath khade rehna,
apni galtiyon ko sweekar karna, aur apni sachchai se bhaagna nahi
Kabhi-kabhi hum itne vyast ho jaate hain
dusron ko khush karne me, ki khud ko jeena bhool jaate hain
Office me role nibhaate rehte hain, ghar me zimmedari,
samaj me pehchaan – par apne liye kuchh bhi nahi.
Tab zindagi chalti to hai, par mehsoos nahi hoti
Mai khud se poochta hoon
kya mai apni zindagi apni marzi se jee raha hoon?
ya sirf wo jee raha hoon jo log mujhse dekhna chahte hain?
Sach ye hai ki aksar hum
dusron ke kahne ko hi apna sach maan lete hain
kya “Yahi sahi hai” kya “Yahi practical hai”
“ya fir Ish umar me yahi karna chahiye”
Aur dheere-dheere apni awaaz kam hoti jaati hai
Zinda hone ka matlab ye nahi ki hum hamesha khush rahein
Zinda hone ka matlab hai – apne dard ko mehsoos kar pana,
apni uljhan ko samajhna, aur usse bhaagne ke bajay
uske saath baith pana Isliye jab likhna ruk jaata hai,
jab blog gayab sa ho jaata hai, to wo aksar failure nahi hota,
Wo andar chal rahi gehri yatra hoti hai Uljhan bhi zaroori hoti hai.
Kyunki bina uljhan ke koi sach janam nahi leta
Aaj jab mai ye likh raha hoon,
to isliye nahi ki mujhe sab kuchh samajh aa chuka hai.
Balki isliye ki mai apne sawaalon se bhaag nahi raha hoon.
Zindagi ka sabse bada dhokha ye hota hai
ki hum sochte hain “baad me jee lenge”
Par baad ka koi guarantee nahi hota Jo pal abhi hai,
jo sawaal abhi hai, jo dard abhi mehsoos ho raha hai
wahi zindagi hai.
Agar ye sawaal aapke mann me bhi uthta hai,
to ghabraiye mat, Iska matlab ye nahi ki aap kamzor hain
Iska matlab ye hai ki aap zinda hain- aur aapka mann abhi mara nahi hai.
Shayad zindagi ka sach isi sawaal ke beech chhupa hota hai
kya mai sach me zinda hu?
Aur shayad
iska jawaab sirf jeene se nahi,
mehsoos karne se milta hi skta hai
RAHUL | MYSTIC | WAY