Kabhi kabhi main shant baithkar sirf ek baat sochta hoon.

Yeh duniya itni badi hai, itne log hain, itni sabhyataayein hain.. phir bhi insaan ki soch itni chhoti kaise reh gayi?

Bachpan se lekar aaj tak maine ek ajeeb si cheez baar-baar dekhi hai.

Jab bhi do anjaan log se milte hain aur baat thodi si gehri hone lagti hai, to ek sawal aksar hawa me tairta hua aa jata hai —
“Aap kaun si jaati me aate hain?”

Jaise kisi insaan ko samajhne ka sabse bada tareeka uski jaati hi ho.

Jaise uska dil, uska vyavhar, uski soch aur uski insaniyat ka koi maayne hi na ho.

Mujhe hamesha yeh sawal andar se hila deta hai.

Kyuki jab hum kisi se milte hain, to hum uska chehra dekhte hain, uski awaaz sunte hain, uski baatein samajhne ki koshish karte hain.
Par kahin bhi uske maathe par yeh likha hua nahi hota ki wo kis jaati ka hai.

Phir bhi samaj ka ek sabse bada hissa aaj bhi is bhram me jee raha hai ki jaati hi insaan ki asli pehchan hai.

Aur sabse ajeeb baat tab lagti hai jab koi gusse me aakar apni jaati ka pramaan dene lag jata hai.

Koi kehta hai — “Hum Thakur hain.”

Koi kehta hai — “Hum Brahmin hain.”

Koi garv se kehta hai —
“Hum Rajput hain, hamare purkhon ne yudh lade hain.”

Us pal mujhe ek hi baat samajh aati hai.

Jab tark kamzor padne lag jata hai, tab aadmi apni Jati praman ka sahara lene lagta hai.

Sach to yeh hai ki jaati ka ghamand aksar ussi ko hota hai, jiske paas apne vyaktitva ka koi aur saboot nahi hota.

Agar kisi insaan ke andar sach me gyaan hai, vinamrata hai aur samvedna hai, to usse kabhi apni jaati ka sahara lene ki zarurat kabhi nahi padega.

Par hamare samaj ki ek aur gehri sachchai hai jise log samajhna hi nahi chahte.

Hum sab ek hi prakriti ka hissa hain.

Vigyan bhi yahi kehta hai ki insaan aur anya jeev ek hi prakritik yatra ka hissa hain.
Hum sab ek hi dharti par janme hain, ek hi hawa me saans lete hain aur ek hi prakriti ka hissa hain.

toh phir bhi insaan ne apne aap ko itni chhoti-chhoti deewaron me khud se hi baant liya hai ki insaniyat kahin n kahin peeche chhoot gayi hai.

Dharm ka bhi ek ajeeb khel hai.

Har dharm ka mool sandesh shanti, prem aur daya hota hai.
Har dharm insaan ko achha insaan banana chahta hai.

Lekin insaan ne dharm ko bhi ek pehchan ka hathiyar bana diya.

Ab dharm logon ko jodne se zyada todne ka kaam kar raha hai.

Hindu Muslim se ladega.
Muslim Hindu se ladega.
Aur har dharm apne aap ko doosre se behtar sabit karne me laga rahega.

Kabhi kabhi yeh sab dekhkar lagta hai ki insaan bhagwan ko nahi, balki apne ahankar ko pooj raha hai.

Sach to yeh hai ki agar dharm insaan ko insaan se alag kar de, to wo dharm nahi balki sirf ek label ban kar reh jata hai.

Mujhe lagta hai insaan ki sabse badi pehchan na uski jaati hai aur na hi uska koi bhi dharm hai.

Insaan ki asli pehchan uska vyavhar hai.

Agar kisi ke andar daya hai, sachchai hai aur doosron ke liye samvedna hai, to wahi insaniyat hai.

Aur agar kisi ke andar nafrat hai, ghamand hai aur bhed-bhav hai, to chahe wo kisi bhi jaati ya dharm ka ho — uska koi arth nahi reh jata.

Isliye main hamesha ek hi baat maanta hoon.

Is duniya me sabse bada dharm agar koi hai, to wo manavta ka dharam hai.

Jab insaan doosre insaan ko sirf ek insaan ki tarah dekhna seekh lega, tab shayad yeh duniya bahut zyada sundar ho jayegi.

Tab shayad kisi ko kisi se yeh poochne ki zarurat nahi padegi ki
“Tum kis jaati ke ho?”

Kyuki us din jawab sirf ek hoga —“Mera jaati dharam bas insaniyat ki hai.”

Aur shayad wahi din hoga jab hum sach me samajh payenge ki
jaati aur dharm se upar sirf ek hi sach hai — insaniyat.

aur jab insaan jaati aur dharm ki deewaron se upar uthkar alag dekhna seekh leta hai,
tab usse har chehre me sirf ek hi sach nazar aata hai — insaniyat.
Aur shayad wahi pal hota hai jab duniya thodi si aur sundar ho jaati hai.
Kyuki sach to bas itna hi hai — insaan ki sabse badi pehchan uski manavta hoti hai.

RAHUL | MYSTIC | WAY

Psychology & Human Mind (internal – category)

Rahul Mystic Way — Inner Space (external – Pinterest)