Main Na Nastik Hoon, Na Aastik – Main Khoj Mein Hoon
Kuch log bhagwan ko mandir me dhoondhte hain,
kuch masjid me, kuch vigyan ke ganiton me.
Aur kuch log, apne hi dard me,
apne hi sawalon me, apni hi khamoshi ke beech.
Main unhi logon me se hoon.
Na main nastik hoon, na main aastik.
Main us jagah khada hoon
jahan satya abhi janm le raha hai,
jahan uttar se pehle, prashn zinda hota hai.
Vigyan mujhe batata hai, taaron tak ki doori,
vastuon ka bhaar, kan-kan me chhupi hai urja.
Lekin vigyan kabhi nahi bata sakta
ki mere seene me itna bojh kyun hai,
meri aankhon me itni maayusi chuppi kyun hai,
aur mere hone ka matlab kya hai.
Isliye main vigyan ka virodh nahi karta,
par main use apna bhagwan bhi nahi bana sakta.
Bas vigyan ko samjhane ka prayash kar sakta hu.
Main us ishwar ko nahi maanta
jo yuddh dekhta rahe aur chup rahe,
jo bhookh dekhe aur pooja maange,
jo dard dekhe aur niyam likhe.
Agar koi shakti is brahmand me hai,
to wo dar nahi ho sakta, wo dhamki nahi ho sakta,
wo dand aur paap ki bhasha me baat nahi kar sakta.
Agar ishwar hai, to wo chetna hona chahiye – na aankh,
na mukut, na singhasan, sirf ek jaagti hui upasthiti.
Wo kisi dharm me band nahi ho sakta,
kisi murti me qaid nahi ho sakta,
kisi jaati ya dharam ke naam me simat nahi rah sakta.
Chetna kisi naam me bandh nahi hoti.
Main Vishwas Me Nahi, Prashn Me Hoon
Duniya sikhati hai – “Maano.”
Par meri atma kehti hai – “Khojo.”
Main kisi dharm ka anuyayi nahi hoon,
main apni hi antar-yatra ka yatri hoon.
Main kisi pustak me bandhkar satya ko qaid nahi kar sakta,
kyunki satya jeevit hota hai – har din naya.
Jo cheez soch ko bandh kar rakh de, wo dharm nahi hoti. aur
Jo cheez dar se bhar de, wo bhagwan nahi ho sakti.
Meri bhakti meri sachchai hai. Meri pooja meri imandaari ki khoj hai.
Yeh Raasta Akele Chalna Padta Hai
Is raaste par bheed nahi hoti, yahan naare nahi hote,
sirf tum hote ho, aur tumhara sach.
Kabhi lagta hai tum nastik ban gaye,
kabhi lagta hai tum bahut adhyatmik ho gaye,
par asal me tum sirf jaag rahe hote ho.
Jaagna kathin hota hai, kyunki jaage hue log
andhe vishwas ko swikaar nahi karte.
Meri Antar-Atma Ki Awaaz
Meri likhawat koi gyaan nahi,
ye meri zakhmi chetna ki pukaar hai.
Main logon ko bhagwan se door nahi karta,
main unhe dar se door karta hoon.
Kyunki jahan dar mit jata hai,
wahin se, asli adhyatmik ki shuruwat hota hai.
Main kisi antim nishkarsh par nahi pahunchna chahta,
main bas sach ke aur nikat rehna chahta hoon.
Main Kya Hoon
Main koi pehchaan nahi, main ek safar hoon.
Main koi uttar nahi, main ek jeevit prashn hoon.
Main koi dharm nahi, main ek khuli hui chetna hoon.
Aur shayad, yahi hona, sabse pavitra hai.
RAHUL | MYSTIC | WAY