Kabhi kabhi main logon ko dekhkar muskura deta hoon…
par andar se ek ajeeb si khamoshi mehsoos hoti hai,

Kyuki ab samajh aane laga hai…
jo sabse zyada pavitra dikhte hain,
aksar wahi andar se sabse zyada toote hote hain..

Har ghar ke andar ek kahani chal rahi hoti hai…
jo kabhi bahar nahi aati.

Bahar se sab theek lagta hai —
log haste hain, saath baithte hain, pooja karte hain,
aur duniya ko dikhate hain ki sab kuch shaant hai..

Par andar… andar awaazein dabayi jaati hain

Sach ko chup kara diya jaata hai,
aur jhooth ko “sanskari” naam de diya jaata hai..

Sach to ye hai…

Rishte toot-te nahi,
unhe dheere dheere khatam kiya jaata hai..

Har chup reh jaana,
har baar apni baat na keh paana,
har baar bas nibha lena…

ye sab milkar rishte ko andar se kha jaata hai.

Ek waqt aata hai…

jab ghar me sab ek dusre ke saath rehte hue bhi,
andar se alag ho chuke hote hain..

Koi kisi ko samajhna nahi chahta,
sab bas apni jagah sahi rehna chahte hain..

Aur wahi se shuru hota hai… rishte ka dhong

Sab apna apna kirdar nibha rahe hote hain.

Beta chup hai kyuki use sikhaya gaya hai ki bolna badtameezi hai,
Beti chup hai kyuki use daraya gaya hai ki awaaz uthane se rishta toot jayega,
patni chup hai kyuki use samjha diya gaya hai ki sehna hi uska farz hai,
aur Pati chup nahi… wo bas sunta hi nahi.

Aur phir…

ye sab milkar ek aisa ghar banate hain
jahan shor nahi hota, par shanti bhi nahi hoti..

Sabse zyada dard ki baat pata hai kya hai?

Jahan sabse zyada pooja hoti hai,
wahan kabhi kabhi sabse kam insaniyat hoti hai.

Log bhagwan ke saamne jhukte hain,
par apno ke saamne kabhi jhukna nahi chahte..

Main aksar sochta hoon…

Agar ek rishta sach ko bardasht nahi kar sakta,
toh wo rishta hai hi nahi..

Wo bas ek aadat hai, ek darr hai,
ya ek samaj ka bojh hai..

Aur sabse gehra ghaav…

wo bachche le jaate hain jo us ghar me palte hain..

Wo dekhte hain ki sach bolne ka koi matlab nahi hai,
wo samajh jaate hain ki dikhawa hi jeene ka tareeka hai..

Phir dheere dheere…

wo bhi wahi ban jaate hain
jisse wo kabhi khud nafrat karte the..

Ye ek silsila hai…

jo chal raha hai, bina ruke

Ek peedhi se doosri peedhi tak…

dikhawa virasat me diya ja raha hai..

Par sach ye hai…

Rishte pooja se nahi, sachchai se jeete hain..

Jahan sach dabaya jaata hai,
wahan pyaar kabhi paida nahi hota..

Aur jahan pyaar nahi hota,
wahan rishte sirf bojh ban jaate hain..

Log darte hain…

Sach bolne se,
khud ko saamne laane se,
apne andar jhaankne se..

Par wo ye nahi samajhte…

Sach se bhaagna asaan hai,
par uske bina jeena bahut bhaari padta hai..

Ek din aata hai…

jab aadmi thak jaata hai..

Na dikhawa bachta hai,
na himmat.. Sirf ek sawal reh jaata hai —

“Kya ye sab sach me zaruri tha?”

Shayad zindagi ka asli arth yehi hai…

Jhooth se bhare rishton ko sambhalna nahi,
balki sach me jeene ki himmat rakhna..

Agar tum sach me jeena chahte ho…

toh shuruaat bahar se nahi,
andar se karo..

Sach bolne ki aadat daalo..

Kyuki…

rishte ka dhong tab tak hi zinda rehta hai,
jab tak koi ek insaan sach bolne ki himmat nahi karta।

Aakhari panti

“Jahan rishte nibhaaye jaate hain, wahan sach dab jaata hai,
Aur jahan sach jeeya jaata hai, wahan rishte badal jaate hain

Pooja se ghar pavitra nahi hota,
Sachchai se hota hai.

Dikhawa ek din toot jaata hai,
Par sach kabhi nahi toot-ta

Aur jo insaan sach jeena seekh gaya…
wo kabhi akela nahi hota”

RAHUL | MYSTIC | WAY

Relationships & Modern Life (internal – category)

Rahul Mystic Way — Inner Space (external – Pinterest)